Të paktën tetë persona kanë mbetur të plagosur në Tel Aviv pasi makina e cila drejtohej nga militanti i Hamasit hyri në mes të turmës duke i përplasur, ndërsa njëri prej tyre mbeti i plagosur si pasojë e goditjes me thikë. Tre nga të plagosurit janë në gjendje të rëndë shëndetësore. I dyshuari është një 20-vjeçar i cili u qëllua për vdekje, pas sulmit që bëri në stacionin e autobusit të mbushur me njerëz. Por përapara se ai të qëllohej për vdekje, ka dalë nga mjeti e më pas vijoi sulmin me thikë. Shefi i policisë së Tel Avivit tha se i dyshuari për sulmin ishte një palestinez nga Bregu Perëndimor. Hamasi pretendoi se njeriu ishte një anëtar dhe sulmi ishte hakmarrje për një bastisje izraelite në një kamp refugjatësh. Imazhet nga vendi i ngjarjes treguan mjetin që kishte përfunduar në trotuar pranë një qendre tregtare, teksa të plagosurve i është dhënë me shpejtësi ndihma e parë. Izraeli shpreson se sulmi i tij në Bregun Perëndimor do të parandalojë sulmet terroriste, por operacionet e mëparshme në shkallë të gjerë nuk kanë arritur të qetësojnë tensionet. Ngjarja vjen ndërsa trupat izraelite po vazhdojnë kërkimet për militantë palestinezë dhe armë në kampin e refugjatëve Jenin. Buldozerë ushtarakë u futen mes rrugicave duke detyruar largimin e mijëra banorëve. Numri i viktimave në mesin e palestinezëve u rrit në 10, brenda dy ditësh. Bastisja në shkallë të gjerë, e cila filloi të hënën, është një nga operacionet më intensive ushtarake në Bregun Perëndimor të pushtuar në gati dy dekada. Më shumë se 140 palestinezë janë vrarë këtë vit në Bregun Perëndimor, pasojë e rritjes së dhunës njëvjeçare. Si pasojë e sulmeve palestineze janë vrarë të paktën 26 izraelitë. Pamjet: AFP