Tani mund të quhet një luftë tregtare ajo që po ndodh mes Kanadasë dhe SHBA. Presidenti i SHBA, Donald Trump, dhe kryeministri kanadez Justin Trudeau janë futur në një përplasje të drejtpërdrejtë lidhur me politikat e tarifave dhe tregtinë ndërkombëtare. Kryeministri Trudeau kritikoi ashpër lëvizjen e Trump për vendosjen e një tarife prej 25% për mallrat që importohen nga Kanadaja. Ai e quajti këtë një “marrëzi” dhe reagoi duke imponuar tarifa të reja për mallrat amerikane. Kanadaja vendosi të aplikojë një tarifë 25% për mallrat amerikane që arrijnë vlerën e 155 miliardë dollarëve. Këto tarifa do të hyjnë në fuqi në dy faza: me 30 miliardë dollarë që do të preken menjëherë, ndërsa pjesa tjetër, 125 miliardë dollarë, pas 21 ditësh. “Kanadezët janë të arsyeshëm dhe të sjellshëm, por ata nuk do të tërhiqen nga një betejë kur është në rrezik mirëqenia e popullatës sonë,” deklaroi Trudeau. Përgjigjja e Trump nuk vonoi dhe e quajti sërish Trudeau “guvernator”, duke dhënë një tjetër sinjal se e konsideron Kanadanë më shumë si një pjesë të SHBA-së. Kreu i shtëpisë së bardhë u përgjigj në platformën e tij “Truth Social”, ku paralajmëroi se nëse Kanadaja do të vazhdonte me tarifat, SHBA do të rrisë masat reciproke në përpjesëtim të plotë. “Dikush duhet ta informojë guvernatorin Trudeau se nëse vendos tarifa për mallrat tona, tarifat tona do të rriten menjëherë në masë të barabartë,” tha Trump. Në një tjetër përgjigje të ashpër, Trudeau deklaroi se Trump ka një qëllim të fshehtë për të shkatërruar ekonominë kanadeze. “Ai mund të dëshirojë ta shkatërrojë ekonominë tonë dhe të na bëjë shtetin e 51-të të Shteteve të Bashkuara të Amerikës, por kjo nuk do të ndodhë kurrë,” tha Trudeau, duke e sfiduar drejtpërdrejt politikën e Trumpit. Ndërkaq, ndikimi i këtij konflikti është shfaqur në bursat botërore që kanë pësuar tronditje të fortë.