Komisioni i Ankimimeve dhe Sanksioneve në KQZ vendos të rinumërohen 114 kuti për qarkun e Beratit pas kërkesës së LSI-së. Në orën 14.00 do të bëhet rinumërimi i votave në KQZ dhe seanca për Beratin është pezulluar derisa të mbërrijnë kutitë e nisë shqyrtimi. PS mbështet kërkesën e LSI për të hapur kutitë në qarkun e Beratit. Përfaqësuesi ligjor i PS-së në KQZ, Eridian Salianji theksoi se në kuadër të transparencës mbështet hapjen e kutive duke shprehur bindjen se rezultati në këtë qark nuk do të ndryshojë. LSI në kërkesën fillestare kërkoi hapjen e 114 kutive të votimit, por tashmë kërkon rinumërimin dhe rivlerësimin 277 kutitë të të gjithë qarkut të Beratit. PS mbështeti kërkesën e parë për 114 kutitë duke nënvizuar se nëse do të ketë ndryshim rezultati nga rinumërimi i këtyre kutive, do të rinumërohen të gjitha. Përfaqësuesi i LSI-së shprehet se ka prova video ku faktohet manipulimi në zgjedhjet e 25 prillit që mund të çojnë në hapjen e kutive të votimit. “Ato vota nuk mund të rrinë në 0, ne duam të hapim të gjitha votat, edhe ato të kandidatëve edhe për subjektet, të hapen e të rinumërohen. Do na duhej pak kohë por sa i referohemi tabelës, të mbështeteshim tek kjo tabelë dhe në vijim të vazhdohej në të gjithë qarkun Berat”, tha përfaqësuesi i LSI-së në KAS, Altin Kaziaj.