Liderë nga e gjithë bota, mes tyre edhe Presidenti amerikan Joe Biden, morën pjesë në ceremonitë funebre në nderim të Mbretëreshës Elizabeth II. Krerë shtetesh e qeverish i kanë bërë nderimet e fundit monarkes, ndër ta presidenti francez Emmanuel Macron, ai gjerman Frank Walter Steinmeier, presidenti irlandez Michael Higgins. E pranishme edhe shefja e ekzekutivit britanik Liz Truss, së bashku me ish-kryeministrat Boris Johnson, Theresa May, David Cameron, Gordon Brown, Tony Blair dhe John Major. Të gjithe monarkët ishin ftuar në funeral, dhe shumica e tyre nuk e anashkaloi pjesëmarrjen ne varrim. Mbretëresha e Danimarkës, Margrethe II – tashmë monarkja e vetëm femër në botë, u ul në krah te kundërt me mbretin Karl pranë arkëmortit. Nuk munguan po kështu as mbretërit e bashkëshortet e tyre nga Holanda, Suedia, Spanja, Norvegjia e Belgjika, si dhe Duka i madh dhe Dukesha e Luksemburgut. Ceremonia solli edhe vizitën e parë ndërkombëtare të Perandorit dhe Perandoreshës së Japonisë që prej ngjitjes në front tre vjet më parë. Krahas pjesëmarrësve në ceremoninë brenda katedrales së Londrës, mijëra të tjerë kishin mbushur çdo hapësirë publike të kryeqytetit britanik, ndërsa këmbanat ranë 96 herë për çdo minutë që simbolizonin vitet e jetës së saj. Në të gjithë territorin e Mbretërisë së Bashkuar u mbajtën 2 minuta heshtje. Presidenti Biden pati mundësinë të vlerësojë kontributin e mbretëreshës, ndërsa nënshkruante në librin e ngushëllimeve. “Mendoj se çfarë na dha mbi të gjitha ishte nocioni i shërbimit. Të gjithë e kemi një detyrim të tillë. Kjo ishte çfarë ajo më përcillte mua. Dhe ishte një nder që e njoha”, tha Biden. Ftesa në ceremoninë gjigande mungoi sakaq për përfaqësuesit e Sirisë, Venezuelës e Afganistanit, për shkak se Mbretëria e Bashkuara nuk ka marrëdhënie të plotë diplomatike me këto vende. Por as liderët e Rusisë, Bjellorusise e Mianmarit nuk u ftuan, ndërkohë në rastin e Iranit, Nikaraguas dhe Koresë së Veriut u vendos që ftesa t`i dërgohej vetëm ambasadorëve dhe jo krerëve të shteteve atje. Pamjet: AFP