Mbështetësit e Sali Berishës kanë festuar vendimin e Apelit, i cili i ktheu vulën dhe logon e PD ish-kryetarit të saj. Një prej tyre ishte edhe këngëtari i njohur Stresi, i cili ka publikuar një foto në rrjetet sociale, ku shihet krah figurave politike të PD dhe babait të tij, në shkallët e selisë blu. Bashkëngjitur kësaj foto, Stresi shkruan: Pritja mori fund, legenët e Lulzim Bashës me gjithë tropojanët e mi tradhtarë, të marrin lopët, delet, e të kthehen nga erdhën. Sot ora 19:30 para PD dhe te rruga Sali Berisha të gjithë të festojmë. Vazhdimisht, reperi ka shprehur mbështetjen për ish-kryeministrin, ndërsa ka marrë pjesë në takime elektorale të PD-së. Gjykata e Apelit Tiranë vendosi këtë të martë të mos pranojë ankimimin e Enkelejd Alibeajt, pjesë e grupimit Basha, për të zhbërë vendimin e dy viteve më parë të Gjykatës së Shkallës së Parë, që njohu legjitimitetin e Kuvendit të Rithemelimit të Partisë Demokratike. Vendimi i Kuvendit të jashtëzakonshëm të Partisë Demokratike që në 11 dhjetor 2021 shkarkoi si kryetar Lulzim Bashën u la në fuqi këtë të martë, duke konfirmuar si kryetar të PD-së, Sali Berishën.