Kreu i Kishës Ortodokse Autoqefale të Shqipërisë mbylli sytë përgjithmonë mëngjesin e kësaj të shtune. Ai u nda nga jeta pas përkeqësimit të gjendjes shëndetësore, ku më 3 janar u transferua me urgjencë për kurim në spitalin e Evangelismosit në Athinë. Në moshën 96 vjeçare, kryepeshkopi Anastas Janullatos nuk mundi të fitonte betejën me jetën. Sinodi i Shenjtë në një mbledhje të jashtëzakonshme shpalli zinë kishtare për 5 ditë deri më 29 janar. Shërbesa e varrimit do të kryhet ditën e enjte më 30 janar në orën 11:00. Ndërsa pritet që pasditen e të martës së 28 janarit në orën 16:00 të mbërrijë trupi i Kryepeshkopit të ndjerë para Katedrales “Ngjallja e Krishtit”, shoqëruar edhe me zhvillimin e homazheve. “Sot lutjet shkojnë për kryepeshkopin Anastas Janullatosin. Dhimbja për humbjen e tij nuk i përket vetëm komunitetit ortodoks, por sidomos këtu në Katedralen ortodokse ka rënë heshtja. Besimtarët dhe punonjësit janë të prekur për ndarjen nga jeta të njeriut që ka rilindur këtë kishë dhe ka dhënë kontribut të çmuar në Shqipëri”. “Kam një pikëllim të thellë. Unë kam jetuar për 23 vite në Greqi, ai erdhi dy herë aty dhe i fola shqip e më foli shqip. Më ka lënë mbresa të forta. Jam shumë e prekur kam humbur 6 familjarë në dy vite e kjo humbje dhemb njësoj”. Andon Selenica prej 20 vitesh shërben në katedrale dhe nuk ishte i përgatitur për këtë lajm. ‘Kryepeshkopi ynë nuk ka fjalë ta përshkruash, njeri paqeruajtës, i dashur, i qetë... çtë them për këtë humbje kaq të madhe (qan)”. Anastas Janullatos u zgjodh Kryepeshkop i Kishës Ortodokse Autoqefale të Shqipërisë nga Patriku i Kostandinopojës në janar të vitit 1991, ku punoi për rindërtimin e kishës që ishte shkatërruar gjatë dekadash persekutimi nga regjimi komunist, si dhe rindezjen e besimit. Veç dëshirës së tij, edhe rregullat diktojnë që ceremonia mortore e kryepeshkopit të bëhet në Tiranë. Me organizimin e një shërbese madhështore, mundësitë janë që kryepeshkopi Anastas Janullatos të prehet brenda kishës, aty ku përkushtoi jetën dhe sic thoshte vetë ai mbi punën në katedralen ortodokse “Ky është kontributi më i madh që kam dhënë, një kontribut teologjik për të ndihmuar Kishën të rizbulojë kush është në të vërtetë. Është një kontribut jete”. Me ndarjen e tij nga jeta, sinodi i shenjtë zgjodhi mitropolitin e korcës Imzot Joanit, si Mbikqyrës , deri në zgjedhjen e kryepeshkopit të ri.