Kongresmeni i Teksasit Lloyd Doggett i kërkon Joe Biden të largohet nga gara për president i SHBA, duke u bërë demokrati i parë që i kërkon publikisht presidentit të tërhiqet. "Ai duhet të marrë vendimin e dhimbshëm dhe të vështirë për t'u tërhequr", tha parlamentari amerikan, duke shpjeguar se vendimi i tij për të dalë "nuk u mor lehtë dhe nuk cenon respektin" ndaj shefit të Shtëpisë së Bardhë. "Angazhimi i Bidenit është për ti shërbyer vendit dhe për këtë arsye kërkoj që ai të tërhiqet", tha Doggett. Ndërkohë, sërish pas performancës së lëkundur të Bidenit në duelin televiziv me Trump, një grup guvernatorësh demokratë kanë kërkuar një takim me presidentin amerikan për të shprehur shqetësimet për rezultatin e zgjedhjeve të nëntorit. Kështu raporton CNN, duke cituar “burime të shumta” për atë që po ndodh në prapaskenat e Partisë Demokratike. Dyshime u ngritën edhe nga ish-kryetarja e Dhomës së Përfaqësuesve, Nancy Pelosi. “Është legjitime të pyesim për gjendjen shëndetësore të presidentit - tha ajo -, është legjitime të pyesim veten nëse ishte një rastësi apo ai ka vërtetë një problem. Është legjitime të pyesim për të dy kandidatët kur shohim shfaqje të tilla”. Pelosi shpjegoi se ajo nuk kishte folur me presidentin që nga debati me Trump më 27 qershor