Policia e Shtetit ka rënë në gjurmët e një grupi që merrej me këmbimin e kundërligjshëm të parave në kriptomonedha dhe anasjelltas duke vënë në pranga 18 persona ndërsa dy shtetas nga Maqedonia e Veriut janë shpallur në kërkim. Operacioni është ndërmarrë në disa zona të Tiranës dhe në Shkodër. Detajet e operacionit, i pari i këtij lloji i finalizuar në vendin tonë, i bëri publike Drejtoresha për Hetimin e Krimeve Kibernetike në Policinë e Shtetit.. “Si rezultat i hetimeve është provuar se 18 shtetasit e arrestuar, individualisht ose me cilësinë e administratorëve të subjekteve ekonomike në Tiranë dhe në Shkodër, këmbenin monedha virtuale ne para dhe anasjelltas, pa qenë të pajisur me licencën e nevojshme për kryerjen e kësaj veprimtarie. Nga kontrollet e kryera në 32 ambiente, janë sekuestruar me cilësinë e provës materiale: 13 pajisje kompjuterike, 27 celularë dhe rreth 750.000 euro, që dyshohet se i shërbenin kësaj veprimtarie të jashtëligjshme.” Gjatë periudhës hetimore është mundësuar dokumentimi me prova bindëse i kësaj veprimtarie kriminale që kryhej duke përdorur si mjete komunikimi rrjetet sociale, si dhe nëpërmjet disa subjekteve ekonomike, në Tiranë dhe në Shkodër. Prokuroria e Tiranës ka dyshime se kemi të bëjmë me pastrim parash. Policia e shtetit bën të ditur se në koordinim me Prokurorinë e Tiranës, po vijojnë hetimet për të nxjerrë përpara përgjegjësisë penale, të gjithë shtetasit e implikuar në këtë veprimtari kriminale, të cilët kanë përdorur kriptomonedhat si mekanizma pagese nëpërmjet grupeve kriminale.