Liderët e Kinës dhe të Rusisë njoftuan zgjerimin e traktatit 20-vjeçar të miqësisë mes dy vendeve, duke vlerësuar atë që quajtën "rol stabilizues" të marrëdhënies së tyre. Kremlini publikoi deklaratën e përbashkët për të shënuar 20-vjetorin e nënshkrimit fillestar të traktatit. Ndërsa liderët Vladimir Putin e Xi Jinping mbajtën një takim me lidhje video, që u transmetua drejtpërdrejt nga televizionet e dy vendeve. Presidenti Putin tha se parimet dhe fryma e traktatit kanë luajtur një rol të rëndësishëm në zhvillimin afatgjatë të marrëdhënieve Rusi-Kinë. Homologu kinez Xi Jinping u shpreh se bota ka hyrë në një periudhë ndryshimesh dhe zhvillimi njerëzor përballet me kriza të shumta. Sipas tij, bashkëpunimi i ngushtë midis Kinës dhe Rusisë ka dhënë energji pozitive për bashkësinë ndërkombëtare duke krijuar një shembull të marrëdhënieve ndërkombëtare të tipit të ri.