Ekonomia e Kinës ishte menduar të nxiste një të tretën e rritjes ekonomike globale këtë vit, por në ngadalësimi dramatik i saj në muajt e fundit ka ngritur kambanat e alarmit në të gjithë botën. Politikëbërësit po përgatiten për një goditje në ekonomitë e tyre, pasi importet e Kinës për gjithçka, nga materialet e ndërtimit deri te pajisjet elektronike po bien. Caterpillar thotë se kërkesa kineze për makineritë e përdorura në kantieret e ndërtimit është më e keqe se sa mendohej më parë. Presidenti i SHBA Joe Biden i quajti problemet ekonomike një "bombë me sahat". Investitorët globalë kanë tërhequr tashmë më shumë se 10 miliardë dollarë nga tregjet e aksioneve të Kinës. Ekonomitë aziatike po marrin goditjen më të madhe në tregtinë e tyre deri më tani, së bashku me vendet në Afrikë. Japonia raportoi rënien e saj të parë të eksporteve në më shumë se dy vjet në korrik, pasi Kina shkurtoi blerjet e makinave dhe çipave. Bankierët qendrorë nga Koreja e Jugut dhe Tajlanda cituan javën e kaluar rimëkëmbjen e dobët të Kinës për uljen e parashikimeve të tyre të rritjes. Megjithatë, nuk është e gjitha një panoramë e zezë. Ngadalësimi i Kinës do të zvogëlojë çmimet globale të naftës dhe deflacioni në vend do të thotë se çmimet e mallrave që dërgohen nëpër botë po bien. Ky është një përfitim për vendet si SHBA dhe Britania e Madhe që ende po luftojnë me inflacionin e lartë. Por si ekonomia e dytë më e madhe në botë, një ngadalësim i zgjatur në Kinë do të dëmtojë, në vend që të ndihmojë, pjesën tjetër të botës. Një analizë nga Fondi Monetar Ndërkombëtar tregon çfarë është në rrezik: kur shkalla e rritjes së Kinës rritet me 1 pikë përqindjeje, zgjerimi global rritet me rreth 0.3 pikë përqindjeje.