Policia greke shkatërroi një grup kriminal duke vënë në pranga 6 shtetas shqiptarë, mes tyre kreun e grupit, Fatjon Prendi 39 vjeç. Në operacionin që morën pjesë dhe forcat speciale EKAM, u sekuestruan mbi 1 ton marijuanë, arsenal armësh dhe sasi të drogave të tjera, përfshirë ato sintetike. Fatjon Prendi rezulton gjithashtu bnjë emër i njohur për drejtësinë greke, i përfshirë në një ngjarje të përgjakshme 13 vite më parë në Krioneri të Greqisë. Konkretisht, më 7 dhjetor 2012, së bashku me 3 persona të tjerë ai grabiti në një banesë greke e për të humbur gjurmët qëlluan edhe me armë në ajër. Me të dëgjuar të shtënat, gazetari i njohur grek Makis Triantafyllopoulos kishte shkuar në vendngjarje për të parë se çfarë kishte ndodhur dhe u përball me grabitësit, të cilët e bllokuan me armë, folën greqishte të thyer dhe i morën makinën, në zonën e Ekalit. Oficerët e policisë që ndodheshin tashmë në zonë, të përforcuar nga njësi të tjera mobile, filluan ndjekjen. Nga shkëmbimi i zjarrit me grabitësit, mbeti i plagosur edhe një polic. Ndaj 39-vjeçarit rëndon akuza për tentativë vrasje dhe grabitje në bashkëpunim.