Pas denoncimit të kreut të opozitës për një rast të dyshuar të vjedhjes së votave në bashkinë e Peqinit, policia dhe prokuroria e Elbasanit kanë nisur hetimet duke preceduar penalisht kryeplakun e fshatit Pekisht Dervish Beqiri. Sipas policisë së Elbasanit në lokalin në pronësi të kryeplakut Dervish Beqiri u gjetën dhe sekuestruan 10 fletë të ngjashme me fletët e votimit, të paplotësuara, të dyshuara të falsifikuara, si dhe një listë emërore e zgjedhësve. Gjithashtu, është sekuestruar portofoli i shtetasit Dervish Beqiri me 280 000 lekë. Më tej, gjatë kontrollit në banesën e kryeplakut të fshatit Pekisht janë gjetur një pushkë e vjetër dhe një pistoletë zhurmuese. Ndaj Dervish Beqirit nisi procedimi penal me akuzën e "Falsifikimit të materialit zgjedhor dhe rezultateve të zgjedhjeve" dhe "Prodhimi dhe mbajtja pa leje e armëve të gjuetisë dhe sportive".