Në një fjalim drejtuar kanadezëve, kryeministri Justin Trudeau i është drejtuar drejtpërdrejt Donald Trump, duke thënë se vendimi i tij për të vendosur tarifa ndaj njërit nga partnerët kryesorë tregtarë të Shteteve të Bashkuara është një gjë shumë e çmendur për ta bërë. “Tani, nuk është zakon i imi të pajtohem me Wall Street Journal, por Donald, megjithëse je një djalë shumë i zgjuar, kjo është një gjë shumë e marrë. Lufta jonë mes miqsh është pikërisht ajo që duan të shohin kundërshtarët tanë nëpër botë”, tha Trudeau. Kryeministri shtoi se do të sfidojë tarifat e SHBA-së në Organizatën Botërore të Tregtisë dhe përmes marrëveshjes së tregtisë së lirë që mbulon të dyja vendet. Kanadaja ka reaguar tashmë me tarifa mbi 30 miliardë dollarë kanadezë mallra nga SHBA dhe ka kërcënuar se do të vendosë taksa prej 125 miliardë dollarësh kanadezë brenda 21 ditësh. “Tarifat tona do të mbeten në fuqi derisa tarifat e SHBA të hiqen dhe jo më herët. Nëse këto tarifa nuk ndalojnë, ne jemi në biseda aktive dhe të vazhdueshme me provincat dhe territoret për të ndjekur disa masa të tjera që nuk janë tarifa, masa që do të tregojnë se nuk ka fitues në një luftë tregtare”, tha Trudeau. "Ajo që ai dëshiron është të shohë një kolaps total të ekonomisë kanadeze sepse kjo do ta bëjë më të lehtë aneksimin e Kanadasë. Për këtë kam një mesazh: Kanadaja nuk do bëhet kurrë shteti i 51-të i SHBA-së”, përfundoi Trudeau