Kryeministrja daneze, Mette Frederiksen, akuzon SHBA-në për presionin që sipas saj po i bëhet Groenlandës. Këtë koment, Frederiksen e bëri para vizitës së disa anëtarëve të administratës Trump në ishull. “Është e qartë se nuk është një vizitë që ka të bëjë me atë që ka nevojë Groenlanda ose çfarë dëshiron Grenlanda nga një vizitë. Është një presion krejtësisht i papranueshëm ndaj Groenlandës, politikanëve dhe popullsisë së vendit, por është gjithashtu ndaj Danimarkës”, tha ajo. Udhëheqësja daneze hodhi poshtë gjithashtu idenë që udhëtimi do të jetë një vizitë private. “Nuk mund të bëni vizitë private me përfaqësues zyrtarë nga një vend tjetër”, shtoi ajo. Më vonë, vetëm disa orë pas komenteve të saj, Shtëpia e Bardhë surprizoi sërish, kur zëvendëspresidenti i SHBA, JD Vance, njoftoi se do të jetë bashkë me gruan e tij në këtë udhëtim. Kopenhageni ruan kontrollin e sigurisë dhe politikës së jashtme në territorin autonom, i cili është ende pjesë e mbretërisë së Danimarkës. Ndërkohë, Trump ka shprehur vazhdimisht dëshirën që SHBA të fitojë kontrollin mbi ishullin, për të cilin ai ka thënë se është vendimtar për sigurinë amerikane.