Pas armëpushimit njëjavor as Izraeli dhe as Hamasi duket të mos jenë më të interesuara për pauza humanitare, pasi kanë kundërshtuar të gjitha thirrjet ndërkombëtare për të rinovuar marrëveshjen, madje Izraeli ka tërhequr edhe negociatorët nga Katari. Përmes një deklarate ushtria sqaroi se një gjë e tillë ndodhi pasi “Hamasi nuk ka përmbushur marrëveshjen për lirimin e ë gjitha grave dhe fëmijëve të mbajtur peng”. Në ditën e tretë të rinisjes së luftës, Izraeli vijoi të godiste me raketa objektivat e militantëve në Gaza, ndërsa Hamas u kundërpërgjigj sërish me breshëri raketash. Siç raporton BBC, ushtria izraelite thotë se po godet në jug qendrat komanduese të Hamasit dhe bazat ku ata ruajnë armët. Banorët e Khan Younis deklaruan se qyteti jugor ka përjetuar bombardimet e tij më të rënda që nga fillimi i luftës.