Pas bombardimeve izraelite që rrafshuan konsullatën iraniane në Siri ku vdiq edhe Mohammed Reza Zahedi, një prej gjeneralëve më të lartë të Gardës Revolucionare të Iranit, Izraeli është vendosur pasditen e së mërkurës në gatishmëri të lartë për një përgjigje të mundshme iraniane. Pas ngjarjes, Irani paralajmëroi reagim të ashpër ndaj Izraelit, ndërsa edhe Agjencia Qendrore e Inteligjencës Amerikane (CIA), ka paralajmëruar autoritetet se mund të goditen nga një sulm iranian. Sikur të mos mjaftonte kjo, Lideri suprem i Iranit, Ayatollah Ali Khamenei, deklaroi të mërkurën në një fjalim para zyrtarëve të vendit në Teheran se Izraeli do të "merrte një shuplakë", pasi sulmi ajror në aneksin konsullor iranian në Damask vrau shtatë ushtarakë të Gardës Revolucionare, dy prej tyre gjeneralë. Në kuadër të masave të ndërmarra mbi një sulm të mundshëm, Izraeli ka njoftuar forcimin e mbrojtjes ajrore. Ndërkombëtarët janë të shqetësuar se situata mund të precipitojë dhe se konflikti në Lindjen e Mesme mund të marrë përmasa akoma më të rrezikshme. Pamjet: AFP