Një ngjarje tronditëse ka ndodhur të dielën në provincën e Salernos, ku një tentativë grabitjeje përfundoi me vdekjen e një shqiptari dhe plagosjen e një tjetri. Autoritetet italiane kanë nisur një hetim të gjerë ndaj një sipërmarrësi 60-vjeçar italian, pronar i vilës ku ndodhi përplasja mes tij dhe grabitësve, për akuzat e vrasjes dhe fshehjes së një trupi. Sipas raportimeve të medias italiane, 60-vjeçari ka deklaruar se ka qëlluar ndaj tre burrave që dyshohet se po përpiqeshin të hynin me forcë në shtëpinë e tij. Njëri prej tyre, një shtetas shqiptar, mbeti i vrarë në vend, ndërsa një tjetër, gjithashtu shqiptar dhe me precedentë penalë, ndodhet i shtruar në spitalin e Napolit, nën mbikëqyrje policore. Personi i tretë është ende në arrati dhe po kërkohet nga karabinierët. Trupi i viktimës u gjet në një përrua, i mbështjellë me çarçafë, në një zonë të pyllëzuar pranë vilës. Sipas hetuesve, ai nuk ka ndërruar jetë në vendin ku u gjet, por është zhvendosur atje pas vrasjes. Bizhuteri të dyshuara si të vjedhura u gjetën në zotërim të të plagosurit, duke forcuar pistën e grabitjes së organizuar. Autoritetet janë duke hetuar edhe dinamikën e përdorimit të armëve. 60-vjeçari thuhet se ka qëlluar me pushkën e tij, të regjistruar ligjërisht, ndërsa një nga grabitësit ka qëlluar me një armë që dyshohet se është marrë nga një kasafortë brenda shtëpisë. Mediat raportojnë se rreth 30 shqiptarë me makina luksoze i kanë shkuar autorit të vrasjes poshtë shtëpisë së tij një ditë më pas dhe i kanë kërkuar ballafaqim. Ata janë larguar vetëm kur ka ndërhyrë policia.