Presidenti i Serbisë, Aleksandër Vuçiç, është shtruar në Spitalin Ushtarak në Beograd këtë të shtunë, raportojnë mediat serbe. Vuçiç ishte sëmurë gjatë qëndrimit në Shtetet e Bashkuara, duke bërë që të ndërpriste vizitën. Ai ishte kontrolluar nga mjekët dhe pas kontrollit kishte vendosur të kthehej në Serbi, sipas transmetuesit publik serb. Gjatë qëndrimit në SHBA, Vuçiç u takua me ish-kryetarin e Nju Jorkut, Rudy Giuliani. Ai do të takohej me disa zyrtarë të lartë të Partisë Republikane, para se të ndërpriste vizitën në SHBA. I dërguari i presidentit amerikan për Misione të Posaçme, Richard Grenell, i ka uruar shërim të shpejtë Presidentit Vuçiç, pasi udhëheqësi serb ndërpreu vizitën papritur. Në një postim në X, Grenell po ashtu ka shprehur keqardhje që nuk ka mundur të takohet me udhëheqësin serb. Sipas agjencisë Tanjug, Vuçiç u sëmurë teksa po përgatitej për takimet me kongresistë amerikanë. Vizita e Vuçiç në SHBA u zhvillua disa ditë para se ai të marrë pjesë në Ditën e Fitores në Moskë, më 9 maj. Kjo vizitë e tij në Rusi është kritikuar nga Bashkimi Evropian. Serbia, që ka raporte të mira me Rusinë, deri më tani nuk ka vendosur sanksione ndaj Moskës për shkak të pushtimit të Ukrainës. Bashkimi Evropian disa herë i ka bërë thirrje Serbisë, shtet që synon të antarësohet në bllok, që të harmonizojë politikën e jashtme me atë të Brukselit.