Prej dy vitesh gjenerali i Gardës Revolucionare të Iranit, Esmail Qaani, i kishte shpëtuar mrekullisht një serie atentatesh, e kjo e ndihmoi të krijonte reputacionin e një njeriu me aftësi të jashtëzakonshme për të shpëtuar pa iu prekur as edhe një fije floku, kur të të gjithë ata përreth vdisnin. Por pikërisht kjo ushqeu edhe dyshimet e forta, se ai që mund të konsiderohej fat apo zotësi e rrallë për të parashikuar rrezikun, në fakt mund të kishte një emër tjetër: Agjenturën. Por tani që Irani është në luftë me SHBA-në dhe Izraelin, fati i tij është sërish subjekt spekulimesh intensive, e madje online kanë qarkulluar lajme se kreu i Forces Quds është arrestuar, e madje edhe mund të jetë ekzekutuar nën dyshimin se vepronte si spiun i Mossadit izraelit. “Esmail Qaani, kreu i Quds Force të Iranit, është ekzekutuar nga Rojet Rebolucionare te Iranit. Ai i ka mbijetuar të gjitha atentateve të deritanishme, e ka qenë edhe me Khamenein gjatë bombardimeve SHBA-Izrael, por ka shpëtuar. Më herët, është marrë në paraburgim nga IRGC nën dyshimin se ishte agjent i Mossad-it,” thuhet në një llogari në platformën X. Deri tani sidoqoftë, nuk ka ende ndonjë konfirmim zyrtar nga autoritetet iraniane. Qaani ishte komandanti i njësisë elitare Quds Force, një strukturë kyçe e Gardës Revolucionare që operon jashtë vendit. Gjenerali iranian është zhdukur disa herë nga skena publike gjatë viteve të fundit. Një nga episodet më të përfolura ndodhi pas sulmeve izraelite në Bejrut në vitin 2024, kur për një periudhë nuk pati informacion për vendndodhjen e tij, para se të shfaqej sërish në publik.