Një defekt teknik në një prej termocentraleve kryesore të prodhimit të energjisë ka lënë pa drita të gjithë Irakun. Sipas agjencisë “Reuters” lajmi u konfirmua të mërkurën nga Ministria e Energjisë Elektrike, e cila bëri të ditur se të gjitha provincat e vendit janë prekur nga mungesa e furnizimit me energji. Sipas autoriteteve, mbyllja e sistemit erdhi si pasojë e një rënieje të papritur të furnizimit me gaz në termocentralin me gaz Rumaila, një nga burimet kryesore të prodhimit të energjisë në jug të vendit. Centrali ndodhet në provincën e Basras, zonë e njohur për industrinë e naftës dhe infrastrukturën energjetike. Një zëdhënës i ministrisë e cilësoi situatën si “incident teknik”, duke theksuar se ekipet janë angazhuar për rikthimin gradual të furnizimit me energji në të gjithë territorin. Ndërprerjet e energjisë nuk janë një fenomen i panjohur për qytetarët irakianë. Prej vitesh, furnizimi me energji nga rrjeti shtetëror ka qenë i pjesshëm dhe me orare të kufizuara, duke detyruar familjet dhe bizneset të mbështeten në gjeneratorë privatë për të përballuar nevojat bazë. Në vitet e fundit, një pjesë e popullsisë ka investuar edhe në panele diellore si alternativë për të siguruar energji të qëndrueshme.