Gjykata e Elbasanit ka dënuar në mungesë me 11 vite e 4 muaj burg Erjon Llapushin, për vrasjen e kamerierit Gazmend Kurmaku, ngjarje e ndodhur në 2 tetor të vitit 2021. Llapushi u shpall fajtor për akuzën e vrasjes me dashje. Prokuroria ka kërkuar 20 vite burg, por gjykata vendosi 17 vite burg, ndërsa me aplikim të nenit 406 të Kodit të Procedurës Penale i ulet 1/3 e dënimit duke e dënuar përfundimisht me 11 vite e 4 muaj burg. Edhe pse në kërkim Llapushi është përfaqësuar në seancë me avokat mbrojtës. Ky i fundit pranoi fajësinë dhe kërkoi aplikimin e uljes së dënimit. Krimi i rëndë ndodhi në një lokal në Elbasan ku Erion Llapushi kapi nga fyti kamerierin 57-vjeçar Gazment Kurmaku për një tavolinë e cila ishte e rezervuar, e kërcënoi me një thikë, e më pas e vrau. 33-vjeçari Erjon Llapushi është një personazh i skeduar tashmë nga policia për aktivitet kriminal dhe dhunë duke u cilësuar person me rrezikshmëri të lartë. Mëngjesin e së premtes forcat e Drejtorisë Vendore të Policise Korçë, Renea, FNSh, Shqiponjat, dhe Forca e Posaçme Operacionale ushtruan kontrolle në 29 banesa të personave kontingjent kriminal apo që kanë lidhje me Llapushin. Forcat Renea rrethuan dhe ushtruan kontroll të në banesën e të shumëkërkuarit, por ai nuk u gjet aty. Në deklaratën e saj policia konfirmoi se gjatë kontrollit u gjetën armë para dhe aparate celularë të cilat dyshohet që përdoreshin për lojëra fati ndërsa në 3 banesa është gjetur edhe sasi lënde narkotike e llojit kokainë.