Pas 6 ditësh në betejë për jetën, plumbi i dalë nga pistoleta e të dashurit të saj i mori jetën Anila Ndoka Prendushit, duke e mbyllur me tragjedi historinë e tyre të dashurisë. 44-vjeçarja, e cila u qëllua më 18 shkurt me një plumb në kokë, gjatë gjithë këtyre ditëve ishte në gjendje të rëndë, nën kujdesin e mjekëve në spitalin rajonal të Shkodrës, dhe mëngjesin e kësaj të marte ka ndërruar jetë. Ajo bashkëjetonte me partnerin e saj, Kolë Manaj, 34 vjeç, prej rreth 5 vitesh, dhe kohët e fundit kishin pasur probleme në çift. Marrëdhëniet mes tyre ishin ftohur deri në diskutime për një ndarje përfundimtare. Ditën e ngjarjes, partneri ka shkuar te puna e 44-vjeçares për ta takuar, dhe janë futur në makinë. Aty dyshohet se gruaja i ka deklaruar ndarjen përfundimtare, dhe pas diskutimeve, në gjendje të rënduar psikologjike, Manaj ka nxjerrë armën, duke qëlluar partneren e tij dhe më pas veten. Nga plumbi, 34-vjeçari ka ndërruar jetë në vend, ndërsa e dashura e tij, nëna e tre fëmijëve nga një martesë e mëparshme, u plagos rëndë, por arriti të mbijetonte vetëm për 6 ditë. Dyshohet se ngjarja ndodhi për shkak të problemeve në çift dhe mosdakordësisë për ndarjen.