Tym i bardhë nga oxhaku i Kapelës Sistine. Sheshi Shën Pjetri shpërthen në brohoritje, duartrokitje, lutje dhe lot gëzimi. Zgjidhet Papa i 267 Kishës Katolike Romane! Kardinalët katolikë zgjodhën pasditen e kësaj të enjteje, në votimin e katërt në konklavë, pasardhësin e Papa Françeskut. Tre votimet e mëparshme, i mbrëmjes së kaluar dhe dy gjatë ditës së sotme, ishin të pasuksesshme, ndërsa votimi i katërt iu jep besimtarëve katolikë në mbarë botën Papën e ri. Tani pritet që bota të kuptojë se kush do të jetë udhëheqësi i 267 i Kishës Katolike dhe çfarë emri do të mbajë gjatë udhëheqjes së tij. Prezantimi i tij me botën do të bëhet nga ballkoni i Vatikanit, kur një nga kardinalët do të thotë fjalët "habemus papam [kemi papën e ri]" dhe më pas udhëheqësi i ri i Kishës Katolike do t'i drejtohet botës. Rreth 40 mijë besimtarë panë tymin e parë duke dalë nga oxhaku, teksa janë mbledhur në Sheshin e Shën Pjetrit, në Vatikan për të festuar zgjedhjen e Papës së Ri. Për zgjedhjen e papës së ri kërkohen votat e dy të tretat të kardinalëve, apo 89 vota nga 133 kardinalë, të cilët u izoluan në Kapelën Sistine që nga dita e mërkurë.