Asnjë provë që të tregojë se rrëzimi i helikopterit me të cilin udhëtonte Presidenti iranian Ebrahim Raisi ishte i qëllimtë, sipas një raporti paraprak të ushtrisë iraniane. “Nuk janë vënë re shenja plumbash apo diçka e ngjashme te mbetjet e helikopterit i cili u rrëzua në një zonë në lartësi të madhe dhe shpërtheu në flakë”, thuhet në raportin e shtabit të përgjithshëm të forcave të armatosura iraniane, sipas Zërit të Amerikës. “Asgjë e dyshimtë nuk është vërejtur në bisedat e kullës së kontrollit me ekuipazhin e fluturimit”, shtohej me tej në raport, ku njoftohej se më shumë detaje do të publikohen ndërsa hetimi përparon. Ebrahim Raisi, i cili shihej si pasardhës i mundshëm i Udhëheqësit Suprem Ayatollah Ali Khamenei, gjeti vdekjen kur helikopteri me të cilin udhëtonte u rrëzua të dielën e kaluar, mes motit të keq në malet pranë kufirit me Azerbajxhanin. Raisi u varros të enjten në qytetin e shenjtë mysliman shiit të Mashhadit, katër ditë pas aksidentit gjatë të cilit gjeti vdekjen gjithashtu edhe ministri i Jashtëm dhe gjashtë persona të tjerë. Sipas ekspertëve, Irani njihet për sigurinë e dobët ajrore dhe të dhënat tregojnë për përplasje të përsëritura, shumë prej të cilave përfshijnë avionë të prodhuar në Shtetet e Bashkuara, të blerë para revolucionit islamik të vitit 1979. Teherani thotë se sanksionet amerikane e kanë penguar atë prej kohësh të blejë avionë të rinj ose pjesë këmbimi nga Perëndimi, për të përditësuar flotën e tij të dobët. Irani shpalli pesë ditë zie për nder të Ebrahim Raisin, ndërkohë që zgjedhjet e reja presidenciale janë caktuar të mbahen më 28 qershor. Pamjet: AFP