Greqia ka vendosur të mos e hapë kufirin me Shqipërinë deri në 26 prill. Lajmi është konfirmuar prej ministrisë greke të mbrojtjes së qytetarit, e cila njoftoi se mbeten në fuqi të gjitha masat kufizuese të marra deri më tani. Burime të kësaj ministrie pohojnë se kufirin do të lejohet ta kalojnë vetëm ata që kanë leje qëndrimi ose janë shtetas grekë. Mbetet në fuqi masa e karantinës prej 14 ditësh për këdo që udhëton drejt Greqisë. Gjoba për shkeljen e saj shkon deri në 1500 euro, ndërsa autoritetet greke do të jenë mjaft të rrepta në monitorim. Përsonat që do të kalojnë kufirin, duhet të jenë të pajisur me një test negativ të koronavirusit jo më te vjetër se 72 orësh si dhe një formular të plotësuar jo më vonë se 24 orë përpara udhëtimit. Greqia po përjeton një hov të pandemisë, me 2.411 infektime të reja të shënuara një ditë më parë e 67 vdekje. Autoritetet druhen se po u zbutën masat për Pashkë, situata mund të përkeqësohet akoma edhe më tej. Por ndërsa Greqia po ruhet nga përhapja e infeksionit prej Shqipërisë, në Gjirokastër së fundi janë shtuar ndjeshëm rastet e reja, e një pjesë e të infektuarve kanë ardhur pikërisht nga vendi fqinj.