Është zhvilluar në gjykatën e Elbasanit seanca e radhës gjyqësore ndaj Dritan Dajtit, me kërkesë të këtij të fundit i cili kërkon nga IEVP Peqin verifikimin e vuajtjes së dënimit dhënë nga gjykata e Elbasanit me 25 vite burg. Nuk është paraqitur në seancë përfaqësuesja ligjore e burgut Peqin, por në një shkresë të tij dorëzuar Gjykatës IEVP deklaron de Dritan Dajtit I mbeten edhe dy muaj e 6 ditë heqje lirie në lidhje me vendimin e parë. Por nga ana tjetër ndaj Dritan Dajtit Gjykata e Lartë ka vendosur rikthimin në burg përjetë. Në këto kushte IEVP Peqin kërkon interpretim ligjor në lidhje me të dënuarin dhe nuk mund të ndërmarrë asnjë veprim pa autorizimin e institucioneve eprore. Nga ana e mbrojtjes veprimet e IEVP Peqin u konsideruan të paligjshme dhe me mungesë korrektësi të qëllimshme në dorëzimin e shkresave. Mbrojtja pretendon se në përllogaritjen e dënimit të vuajtur IEVP nuk ka marrë parasysh një vendim për përfitim të uljes së dënimit ndaj të dënuarit. Seancat ndaj Dritan Dajtit në gjykatën e Elbasanit vijojnë të zhvillohen përmes videokonferëncës pas vendimit të Drejtorisë së Përgjithshme të Burgjeve për arsye sigurie. Ndërkohë pak ditë më parë i dënuarit i përjetshëm u lejua të marrë pjesë në ceremoninë mortore për varrimin e nënës së tij e cila ndërroi jetë, ceremoni e cila u zhvillua nën mbikëqyrje të rreptë policore.