Një gjeneral i lartë iranian mori pjesë në funeralin e oficerit ushtarak Mohammed Reza Zahedi të shtunën, duke u zotuar se Irani do t’i përgjigjet sulmit ndaj konsullatës së ambasadës së tij në Damask, që vrau figurat kryesore nga Korpusi i Gardës Revolucionare. Bagheri, i cili është komandanti ushtarak i rangut më të lartë në vend, tha se sulmi nuk do të mbetet pa përgjigje dhe Irani do të vendosë se si dhe kur t’i përgjigjet sulmit, sipas medias vendase Tasnim. Ai paralajmëroi edhe SHBA-në, duke e cilësuar përgjegjësen kryesore për sulmin në Damask. Deklaratat e Bagherit të shtunën u dëgjuan nga një turmë e madhe njerëzish, që ishin mbledhur në qytetin perëndimor të Isfahanit për varrimin e Zahedit. Videot nga agjencitë e lajmeve dhe media shtetërore tregojnë qytetarët që u mblodhën nëpër rrugë dhe iu afruan arkivolit të oficerit, që ishte dekoruar dhe qëndronte i hapur. Izraeli e ka intensifikuar fushatën e tij ushtarake kundër Iranit dhe grupeve të tij përfaqësuese në rajon që nga sulmi i 7 tetorit ndaj Izraelit nga Hamasi. Shtetet e Bashkuara janë në gatishmëri të lartë dhe përgatiten në mënyrë aktive për një sulm “të rëndësishëm” që mund të ndodhë brenda javës së ardhshme nga Irani që synon asetet izraelite ose amerikane në hakmarrje për sulmin në Damask, tha një zyrtar i lartë i administratës për CNN të premten.