Presidenti Vladimir Putin nënshkroi të premten një strategji të re të politikës së jashtme ruse që synon të kufizojë "dominimin" perëndimor dhe të identifikojë Kinën dhe Indinë si partnerë kryesorë për të ardhmen. Dokumenti i ri vendos sërish perden e Luftës së Ftohtë midis Rusisë dhe Perëndimit lidhur me ofensivën e Moskës në Ukrainë. "Federata Ruse synon t'i japë përparësi eliminimit të gjurmëve të dominimit të Shteteve të Bashkuara dhe vendeve të tjera jomiqësore në politikën botërore", thuhet në dokumentin e strategjisë. Termi "vende jomiqësore" përdoret nga Rusia për t'iu referuar atyre vendeve, veçanërisht në Evropë dhe Amerikën e Veriut, që kanë dënuar fushatën ushtarake të Moskës në Ukrainë dhe kanë miratuar sanksione. Dokumenti prej 42 faqesh, i cili u publikua në faqen e internetit të Kremlinit, thoshte se Rusia do të synonte "të krijojë kushtet që çdo shtet të refuzojë qëllimet neo-kolonialiste dhe hegjemoniste". Duke shpallur dokumentin në një takim të këshillit të sigurisë, Putin tha se përditësimet e strategjisë së Rusisë për angazhimin në skenën globale ishin të nevojshme për shkak të "ndryshimeve radikale" në botë. Strategjia pasqyron qëndrimin gjithnjë e më anti-perëndimor të liderit rus përballë sanksioneve dhe ndihmës ushtarake perëndimore për Ukrainën, siç u pa edhe në fjalimin e tij për gjendjen e kombit muajin e kaluar. Rusia është bërë gjithnjë e më e izoluar në skenën botërore dhe ka kërkuar të forcojë lidhjet politike dhe ekonomike me vendet në Afrikë dhe Azi, si Kina dhe India, të cilat morën një qëndrim më neutral ndaj ofensivës së saj në Ukrainë. Pamjet: AFP