Flamuri kombëtar ulet sot në gjysmështizë, në të gjitha institucionet shtetërore dhe publike, pasi qeveria shpalli 2 nëntorit ditë zie kombëtare, në nderim të ish-kryeministrit të vendit, Fatos Nano, që u nda nga jeta mesditën e të premtes, në moshën 73-vjeçare. Homazhet në nderim të liderit historik të Partisë Socialiste, dhe një prej politikanëve me kontribut të çmuar në jetën publike dhe politike të vendit, do të zhvillohen te Pallati i Kongreseve, në kryeqytet. Homazhet publike për ish-kryeministrin Nano nisin prej orës 08.30 deri në orën 11.00, dhe më pas në 11.15 deri në 11.45 politikani i ndjerë do të nderohet nga personalitetet politike, shtetërore dhe diplomatike. Ndërsa, në orën 12.00, në të gjithë vendin do të mbahet një minutë heshtje në nderim të ish-kryeministrit Nano, trupi i të cilit do të niset për në banesën e fundit, në Sharrë, ku do të pushojë përgjithmonë.