Akademia e klubit të Manchester Sitit dhe shkolla e tij e futbollit për fëmijët do të kenë në Durrës kampusin e tyre për rajonin. Lajmin e njoftoi kryeministri Rama në një postim në Facebook pas negociatave të zhvilluara me klubin e famshëm në veri të Anglisë. Ndërsa marrëveshja u nënshkrua nga ministrja e Arsimit, Evis Kushi dhe kryebashkiakja Emiriana Sako. “Sapo ka nisur kapitulli i ri i një historie miqësie e ardhmërie, në një rrugë të përbashkët suksesi me miqtë tanë të paçmuar të Emirateve të Bashkuara, falë mbështetjes së të cilëve Shqipëria hyn edhe në hartën prestigjioze të CITY FOOTBALL GROUP”, shkruajti Rama. Arritja e një marrëveshje të tillë do të jetë e para e këtij lloji në Shqipëri me përfitime të drejtpërdrejta për të rinjtë e Durrësit, një qytet me tradita në futboll.