Dhuna në familje dhe abuzimet ndaj të miturve po shënojnë rritje shqetësuese në qarkun e Fierit. Vetëm gjatë muajit të kaluar, policia e Fierit ka referuar mbi 18 raste në Prokurori, ku pjesa më e madhe e tyre lidhen me dhunën ndaj grave dhe abuzimet ndaj fëmijëve. Sipas psikologes Lumturi Vruho nga Qendra “Horizont”, dhuna ndaj të miturve ndodh për arsye të ndryshme si prindërimi i papërshtatshëm, kriza ekonomike, mungesa e edukimit emocional të fëmijëve, dhe historia problematike brenda familjeve. Sot, fatkeqësisht, dhuna është bërë një fenomen i zakonshëm. Izolimi, krizat sociale dhe përdorimi i tepërt i teknologjisë ndikojnë negativisht në lidhjen mes prindërve dhe fëmijëve. Kjo sjell mungesë komunikimi dhe empatie, duke krijuar një mjedis të përshtatshëm për konflikte dhe abuzime, shprehet Vruho. Një tjetër aspekt shqetësues mbetet dhuna në çift dhe mosmarrëveshjet brenda familjes. Psikologia thekson rëndësinë e mbështetjes psikologjike për çiftet që përballen me kriza. “Sot ka më shumë ndërgjegjësim. Psikologu nuk është më tabu. Gjithnjë e më shumë çifte kërkojnë ndihmë profesionale për të ruajtur marrëdhënien dhe për të mbrojtur stabilitetin familjar. Edhe njëri nga partnerët, nëse tregon kujdes dhe dëshirë për të ndryshuar, mund të përçojë ndikim pozitiv në jetën e përditshme të familjes, Psikologët dhe ekspertët nxisin gratë dhe partnerët që përballen me dhunë apo tensione në marrëdhënie të mos heshtin, por të kërkojnë ndihmë në kohë. Kontakti me një psikolog apo denoncimi dhunës pranë institucioneve mund të parandalojë përshkallëzimin e situatës. Ka raste kur konfliktet në familje kanë përfunduar në dhunë të rëndë, madje edhe me pasoja që rrezikojnë jetën. Ndaj, ndërhyrja e hershme mbetet thelbësore për të ruajtur sigurinë dhe shëndetin mendor të të gjithë anëtarëve të familjes.