Me qindra besimtarë të krishterë dhe jo vetëm, kanë nisur festimet për festen e shen Kozmait të Etolit. Mbrëmjen e vonë të ditës së djeshme ata i janë drejtuar këtij manastiri në fshatin Kolkondas të Fierit ku edhe kanë nisur pelegrinazhin me besimin e mrekullive të shenjtorit Kozma. Besimtarët kanë ndezur qirinj duke i përcjellë lutje shenjtorit dhe besuar në fuqinë mrekullibërëse të tij, ndwrsa kanw përcjellë urimet më të mira për familjet e tyre. Festa e Shën Kozmait vazhdon edhe ditën e nesërme, në 24 gusht me kremtimet fetare, ditë që përkon edhe me martirizimin e shenjtit Kozma të Etolit. Historia dhe gojëdhënat e shumta tregojnë se shenjti Kozma u vra nga Kurt Pasha në 24 gusht 1779, në shenjë hakmarrjeje të miqësisë së tij me Ali Pashë Tepelenën, në fshatin Mujalli të Fierit, fshati ngjitur me manastirin e Shën Kozmait. Ndërsa trupi i tij u gjet po në 24 gusht në lumin Seman nga një prift i kishës së Shën Marisë (kisha ngjitur me manastirin e Shën Kozmait). Trupi i tij u varros pranë kësaj kishe, ndërsa Ali Pashë Tepelena, në shenjë mirenjohjeje të thellë për shenjtin që i parashikonte fatin, financoi dhe urdhëroi ndërtimin e kishës se shen kozmait në vitin 1815. Kjo është një nga shkaqet pse Festa e Shën Kozmait eshte kaq popullore në Myzeqenë e Fierit dhe pse besimi në fuqinë mrekullibërëse të shenjtorët është shumë i madh. Bëhet fjalë për një shenjtor për të cilin gojëdhënat janë të gjalla, që ka jetuar deri vonë dhe trupi i tij eshte gjetur në lumin Seman të Fierit. Festa e Shën Kozmait është një nga festat më të rendesishme të besimit të krishterë ortodoksë në Fier e cila kremtohet nga besimtarë të të gjitha besimeve.