Kryeministri Edi Rama, zhvilloi një takim me studentët e Kolegjit të Europës në Bruzh. “U linda, u rrita gjysmën e jetës time në Shqipërinë e luftës së ftohtë, i izoluar nga bindja e Perëndimit. Një Kore e Veriut e Europës. Për mua Europa nuk ishte e vërtetë, ishte një mit. Përfytyroni një qiell të errët dhe krejt befas të kap syri një yll të zbehtë. Europa ishte një yjësi që e shihnim nëpërmjet ekranit të mjegullt. Pastaj erdhi 1989, por Shqipëria nuk iu bashkua festës. Muri i Berlinit ra, por muri ynë ngeli i paprekur. Ata tanët na thonin: ‘Ne nuk jemi si ata, ne jemi ndryshe. Ne jemi të vërtetët, ata janë fals, të degjeneruar’. Në vitin 1990, mijëra njerëz të dëshpëruar në Tiranë, kapërcyen muret e ambasadave për t’u larguar. Tranzicioni që erdhi ishte i rrëmujshëm, i dhimbshëm dhe shpesh kaotikë.