Brenda vitit 2030, Shqipëria nuk synon vetëm anëtarësimin në Bashkimin Evropian, por edhe të kthehet në një vend eksportues neto. Nga Athina, ku mori pjesë në takimin e 6-të të Partneritetit për Bashkëpunim Transatlantik në Energji, zëvendëskryeministrja Belinda Balluku, njoftoi aleatët europianë dhe amerikanë se një gjë e tillë nuk do të realizohet vetëm përmes korridorit 8 energjetik. “Shqipëria synon brenda vitit 2030 të kthehet nga një vend importues në një vend eksportues neto, si dhe të ndajë me ta planet e rëndësishme të interkonjeksionit, ku përfshihet jo vetëm korridori VIII energjetik, por edhe korridori i quajtur Lindje-Perëndim që shtrihet mes Rumanisë, Bullgarisë, Maqedonisë së Veriut, Shqipërisë dhe Italisë”. Në takimin për energjinë, të zhvilluar në kryeqytetin grek, u diskutuan çështje kyçe të sigurisë energjetike dhe bashkëpunimi mes Shteteve të Bashkuara të Amerikës, Bashkimit Europian dhe vendeve të Europës Qendrore e Jugore.