Duhej të ishte një ditë e bukur dhe argëtuese në plazhin e Durrësit, por u shndërrua në tragjedi për dy pushues me origjinë nga Gana dhe shtetësi angleze, të cilët kishin marrë një jet ski dhe po lundronin në ujërat e Adriatikut. Ata pësuan një aksident rrethanat e të cilit janë ende të paqarta. Megjithatë policia e Durrësit deklaroi se aksidenti dyshohet se ndodhi pas manovrave te gabuara në drejtimin e jet ski-së. Dy personat përfunduan në urgjencën spitalore të Durrësit ku u konstatua vdekja e 34-vjeçarit, ndërsa 31-vjeçares Vera Dueni po I jepet ndihmë e specializuar mjekësore. Ajo ndodhet jashtë rrezikut për jetën.