Korrupsioni shënoi rënie gjatë vitit 2024, me dhjetëra zyrtarë të lartë të hetuar dhe miliona euro pasuri kriminale të sekuestruara e konfiskuara. Janë këto rezultatet e punës së Prokurorisë së Posaçme kundër Korrupsionit dhe Krimit të Organizuar përgjatë vitit 2024, që u publikuan nga kreu i këtij institucioni, Altin Dumani, në Komisionin e Ligjeve. Por, shqetësim vijojnë të mbeten grupet e strukturuara kriminale, që sipas kreut të SPAK, kanë rritje të aktivitetit dhe veprojnë në disa qytete të vendit, por edhe në Evropë e më gjerë. Gjatë vitit 2024, SPAK ka sekuestruar 11 milionë euro kriptomonedha. Shifra u zbulua nga Altin Dumani, i cili kërkoi ndryshime ligjore për mbajtjen e tyre. Për opozitën shqetësim kryesor është krimi zgjedhor. Deputeti demokrat, Oerd Bylykbashi, tha se task-forca e ngritur për 11 Majin dështoi, por për këtë nuk mungoi dhe përgjigjja e prerë e kreut të SPAK. Opozita ngriti gjithashtu shqetësimin për njëanshmëri të SPAK në hetime, duke sjellë në vëmendje rastet e kreut të Partisë Demokratike, Sali Berisha, dhe atij të Partisë së Lirisë, Ilir Meta.