Dy shtete, anëtare të NATO-s dhanë alarminm për shkeljen e hapësirës së tyre ajrore nga dronë rusë. Rumania njoftoi se një dron i Moskës ka hyrë nën qiellin e saj gjatë sulmeve që Moska ndërmori gjatë natës kundër Ukrainës, e Letonia po ashtu njoftoi rrëzimin e një mjeti të tilla ajror pa pilot në pjesën lindore të saj. Bukureshti menjëheëherë aktivizoi avionë luftarakë të tipit F-16 për patrullimin e hapësirës ajrore ndërsa njoftoi për kujdes banorët e dy rajoneve lindore përmes mesazheve me tekst. Rumania tha se po heton mundësinë e një pike ku mund të ketë rënë mjeti fluturues në një zonë të pabanuar përgjatë kufirit me Ukrainën. Nuk ka patur njoftime për viktima apo dëme. Ministri i Mbrojtjes i Letonisë, Andris Sprūds, sqaroi dhe ai një dron rus ishte rrëzuar një ditë më parë pranë qytetit Rezekne dhe me gjasë ishte futur në Letoni nga Bjellorusia fqinje. Qyteti Rezekne, me mbi 25,000 banorë, shtrihet rreth 55 kilometra në perëndim të Rusisë dhe rreth 75 kilometra nga Bjellorusia, aleati i ngushtë i Kremlinit. Mircea Geoană, zëvendëssekretari i përgjithshëm i NATO-s në largim dhe ish-diplomat i lartë rumun, u shpreh se aleanca ushtarake e dënoi shkeljen e hapësirës ajrore rumune nga Rusia. “Edhe pse nuk kemi informacione qëe të tregojnë se bëhet fjalë për një sulm të qëllimshëm nga Rusia kundër aleatëve, sërish këto akte konsiderohen të papërgjegjshme dhe potencialisht të rrezikshme”, deklaroi ai. Ushtria e Letonisë e pranoi dhe ajo se nuk kishte tregues se Moska apo Minsku i kishin nisur dronët qëllimisht drejt vendit të saj. Në një deklaratë publike, ushtria letoneze tha se kishte identifikuar vendin e rrëzimit të dronit dhe se po vazhdonin hetimet.