Drejtori i përgjithshëm i Fiorentinës, Joe Barone, ndodhet në gjendje të rëndë shëndetësore në spitalin “San Raffaele” në Milano dhe nuk ka asnjë përmirësim në krahasim me ditën e djeshme. Pasditen e së dielës, teksa po zhvillohej takimi teknik para ndeshjes kundër Atalantës, u bë e ditur se Barone u shtrua në spital në terapi intensive. Pranë tij ndodhet bashkëshortja, Camilla, dhe katër fëmijët, që u kthyen nga Amerika. Mediat italiana shkruajnë se Barone ka pasur shqetësime rreth orës 15:30 të së dielës. Më pas ai është dërguar në spitalin e Bergamos dhe u transferua me urgjencë në “San Raffaele” të Milanos me helikopter. Atë e kanë shoqëruar fillimisht trajneri italian i Fiorentinës, kapiteni dhe disa miq. “Joe Barone është aktualisht i shtruar në njësinë e kujdesit intensiv kardiokirurgjik të spitalit San Raffaele. Kushtet klinike janë kritike, por të qëndrueshme. Barone aktualisht po trajtohet me më shumë terapi të avancuara për sa i përket mbështetjes dhe funksioneve kardiake. Një përditësim i ri do të dalë nesër”, thuhej në njoftimin e Fiorentinës. Pamjet: AFP