Azgan Mërnica, autori i vrasjes së policit Nevruz Cenalia në fshatin Baltëz të Fierit, është dorëzuar mbrëmjen e së mërkurës në polici. Pas më shumë se 48 orësh kërkim, 23-vjeçari ka vendosur t’i japë fund arratisë dhe të paraqitet vetë para uniformve blu. Burime pranë policisë bëjnë me dije se një rol të rëndësishëm për ta bindur të dorëzohet kanë qenë negociatat e babait dhe dajës së tij. Gjatë kësaj kohe dyshohet se ai kishte qëndruar në afërsi të fshatit Dërmenas ku edhe është bërë dorëzimi i tij, pasi e bindën familjarët. Azgan Mërnica ekzekutoi me plumb në kokë më 13 maj efektivin e forcave Shqiponja në Fier për shkak të një konflikti të çastit dhe më pas u arratis. Ndërkohë, të mërkurën polici Nevruz Cenalia u përcoll për në banesën e fundit në fshatin Baltës pas homazheve në Teatrin Bylis në Fier. Familjarë, kolegë, qytetarë, por edhe përfaqësues të shtetit i kanë dhënë lamtumirën e fundit.