Doganat greke kanë paralajmëruar një grevë 48 orëshe duke nisur nga data 2 prill në orën 08.00 të mëngjesit dhe deri në 04 prill. Si pasojë e grevës do të paralizohet totalisht lëvizja e mjeteve nga dhe drejtë Greqisë në të gjitha pikat doganore që lidhin fqinjin tonë me vendet e rajonit. Përsa i përket doganave greke që janë porta hyrëse me vendin tonë, stafi në to paralajmëroi pjesëmarrje të gjerë në grevë. Gjatë një kontakti të Top Channel me doganën e Kakavijës dhe atë të Kapshticës, u komunikua se gjatë 48 orëve të grevës nuk do të mund të lëvizë asnjë mjet udhëtarësh dhe kamionë nga Greqia dhe drejtë saj. Mësohet se do të lejohen të kalojnë në kufi vetëm këmbësorët të cilët kalojnë pa bagazhe dhe çanta. Probleme do të ketë edhe për lëvizjen e mallrave në portet dhe aeroportet e vendit. Sindikata e doganave tha se vendimi për fillimin e grevës ishte i pa shmangshëm pasi qeveria nuk ka përmbushur asnjë nga pikat e kërkesave të kësaj sindikate. Sindikata nuk pranoi ti përgjigjet pyetjes së top-ch lidhur me problemet që mund të shkaktohen prej kësaj greve pasi ajo përkon me ditët pas pashkës katolike dhe gjatë atyre ditëve do të ketë lëvizje të shtuar qytetarësh në dogana, por edhe kërkesë të shtuar për mallra. Pamjet: AFP