Për herë të parë, Dita e Çlirimit të Shqipërisë u festua jo vetëm në Sarandë, Delvinë dhe Konispol, por edhe në varrezat monumentale të shqiptarëve të Çamërisë, në Kllogjer. Qytetarë dhe përfaqësues të Shoqatës Çamëria Sarandë dhe Organizatës së Veteranëve Konispol u mblodhën në Kllogjer të Sarandës, një nga territoret më të dhimbshme të kujtesës historike shqiptare, ky vendndalim simbolik i eksodit biblik të vitit 1944. “Bashkë me Shoqatën Çamëria – dega Sarandë dhe Organizatën e Veteranëve – dega Konispol, nderuam në varrezat e Kllogjerit Ditën e Çlirimit, duke kujtuar dhimbjen e kësaj toke që mban historitë e mijëra shqiptarëve të Çamërisë, të cilët dhanë jetën në udhën e mundimshme drejt lirisë. Sepse, Dita e Çlirimit nuk ka vetëm dëshmorët, por edhe ata që u bënë therror vetëm pse ishin shqiptarë”, shkruan deputeti i PS në Sarandë, Ardit Bido.