Prokurorja e Gjykatës së Lartë greke , Georgjia Adelini, ka urdhëruar një kallëzim penal për mashtrim elektorati ndaj 11 deputetëve që në zgjedhjet e fundit parlamentare përfaqësonin partinë e ekstremit të djathtë Spartanët, si dhe ndaj një prej krerëve të Agimit të Artë, të dënuarit me heqje lirie , Ilias Kasidiaris. Kallëzimi penal ka ardhur pas një hetimi dhe denoncimit public që ka bërë kreu I kësaj partie Vasilios Stiga disa muaj më parë për prapaskenat dhe veprimet e paligjshme në partinë e tij, duke i cilësuar deputetët si mafia greke dhe Ilias Kasidiarin si “Don Corleone”. Sipas tij 11 deputetët e grupit të tij parlamentar kanë mashtruar votuesit grekë duke marrë pjesë në këtë parti , por ndërkohë kanë qënë drejtpërdrejt të ndikuar nga neonazisti i dënuar I Agimit të Artë. Siç doli nga hetimi i kryer personalisht nga Prokurorja e Gjykatës së Lartë, Kasidiaris urdhërohet të ndiqet penalisht si autori moral i mashtrimit të elektoratit, pasi rezultoi se ai ishte kreu i vërtetë i partisë Spartanët, duke udhëhequr dhe kontribuar me vendosmëri në hyrjen e saj në parlament dhe në zgjedhjen e deputetëve tesaj . Ndjekja penale e e tij u bazua në ekzistencën e provave se ai kishte kontakte të vazhdueshme nga burgu me kandidatë për deputetë të Spartanëve dhe se kishte marrë përsipër drejtimin dhe mbështetjen politike të tyre. Sipas ligjit grek, partitë nuk mund të marrin pjesë në zgjedhje nëse "udhëheqësit e tyre të vërtetë", jo vetëm përfaqësuesit e tyre zyrtarë, janë dënuar për krime që parashikojnë dënime deri në burgim të përjetshëm, duke filluar nga tradhtia ose spiunimi deri te pjesëmarrja në një organizatë kriminale. Ky zhvillim mund të sjellë ndryshime të mëdha në skenën politike të vendit nëse zgjedhja e ligjvënësve anulohej, dhe vendet e tyre mund t'i shpërndaheshin pjesës tjetër të partive në parlamentin prej 300 deputetësh. Një gjykatë zgjedhore pritet të nxjerrë një vendim mbi çështjen deri në qershor, i cili pa dyshim do të ndikojë edhe në zgjedhjet për Parlamentin Evropian.