Një shtetas shqiptar u dënua me tre vite burg pasi u zbulua se merrej me tregtimin e drogës në Ebikon të Zvicrës ne bashkëpunim me disa të tjerë. Ku rast tregoi më shumë se si vepron mafia shqiptare e drogës në Zvicër, teksa ka raporte të vazhdueshme për arrestimin e personave të përfshirë në këtë veprimtari kriminale. Autori hyri në Zvicër nga Shqipëria në vitin 2022 dhe u vendos në një apartament në Ebikon. Siç thuhet në aktgjykim, ai kishte ardhur qëllimisht në Zvicër për të shitur drogë. Që në ditët e para, u përfshi në tregtinë e drogës me një bashkatdhetar. Ai mori drogën nga një furnizues i panjohur, e paketoi në çanta më të vogla dhe e ruajti në një vend të fshehtë në një pyll aty pranë. Nga aty, komunikonte me klientët për çmimin, vendin dhe orën e dorëzimit. Në total, sipas hetimeve, ai shiti 800 gram kokainë dhe 200 gram heroinë, nga të cilat fitoi 95.000 franga. Përveç të ardhurave direkte nga shitja e drogës, të cilat i përdorte për të paguar banesën dhe shpenzimet e tjera, tregtari merrte një “pagë” fikse prej 2000 frangash në muaj. Sipas vendimit të gjykatës, ai donte të fitonte 10 mijë franga dhe më pas të kthehej në Shqipëri. Por u arrestua në pranverën e vitit 2023 dhe tashmë është i dënuar nga gjykata penale e Lucernit.