Kryeministri i Suedisë, Ulf Kristersson, u distancua nga protesta e kësaj jave në të cilën një irakian me banim në Suedi dogji librin e shenjtë të myslimanëve Kuranin, jashtë një xhamie në Stokholm. "Është e vështirë të thuash se cilat do të jenë pasojat. Mendoj se ka shumë njerëz që kanë arsye të reflektojnë. Nuk ka nevojë të ofendohen njerëzit e tjerë. "Unë mendoj se vetëm për shkak se disa gjëra janë të ligjshme, ato nuk janë domosdoshmërisht të përshtatshme Të mërkurën, pasi iu dha leja nga policia suedeze për të protestuar, refugjati irakian Salëwan Momika shkeli më këmbë një kopje të Kuranit dhe ndezi disa faqe jashtë xhamisë më të madhe të Stokholmit. Incidenti i cili përkoi me fillimin e festës myslimane të Kurban Bajramit dhe përfundimin e pelegrinazhit vjetor në Mekë të Arabinë Saudite, shkaktoi protesta në Irak dhe gjetkë. Policia suedeze i kishte dhënë Momikës, 37 vjeç, leje për të organizuar protestën e tij në përputhje me mbrojtjen e fjalës së lirë. Ata më vonë thanë se kishin nisur një hetim për "agjitacion kundër një grupi etnik", duke vënë në dukje se Momika kishte djegur faqe nga libri i shenjtë i myslimanëve.. Në Irak, protestuesit të enjten u futën për pak kohë në rrethojat e ambasadës suedeze në Bagdad, në shenjë proteste ndaj djegies së Kuranit. Këtë veprim kryeministri suedez, e cilësoi të papranueshëm. “Është sigurisht krejtësisht e papranueshme të kesh njerëz që hyjnë në mënyrë të paligjshme në ambasadat suedeze në vende të tjera” Djegia e Kuranit shkaktoi zemërim në pjesë të botës myslimane, ndërsa aktin e ka ka dënuar edhe Presidenti turk Recep Tayyip Erdogan. Turqia ende nuk ka ratifikuar pranimin e Suedisë në NATO, duke thënë se bllokimi ka të bëjë me dështimet e këtij shteti për të shtypur grupet kurde, që Ankaraja i cilëson “terroriste”. Pamjet: AFP