E mërkura duhet të ishte një ditë normale pune, kur inspektori i policisë Edlir Alleshi së bashku me kolegun e tij kishin dalë të patrullonin në rrugën “Hysen Xhura” ne kryeqytet. Por përballja me 42 vjeçarin Klered Bozhanaj e tjetërsoi situatën. Ai nuk iu bind urdhrit të policisë dhe hapi zjarr në drejtim të tyre duke plagosur inspektorin. Top Channel ka siguruar videon e ngjarjes ku tregon se forcat shqiponja po lëvizin në trotuar në drejtim të mjetit të Klerend Bozhanajt kur ky i fundit hapi zjarr. Edlir Alleshi plagoset ndërsa kolegu i tij për t’i shpëtuar rrezes së plumbave futet në një lokal. Polici pasi iu nënshtrua një operacioni kirurgjikal ndodhet jashtë rrezikut për jetën, ndërsa autori i ngjarjes u vu në pranga 1 ditë më vonë teksa po tentonte të hynte në shtëpinë e tij në kryeqytet. 42 vjeçari nuk ka të shkuar kriminale. Ka jetuar në itali si emigrant ndërsa prej gushtit ndodhej në Shqipëri ku sipas te afërmve ka shfaqur shenja të dukshme depresioni por nuk ishte kuruar.