Organizata Botërore e Shëndetësisë i ka bërë sërish thirrje Kinës që t’i ndajë të dhënat që ka për të kuptuar më shumë për koronavirusin, pasi kanë kaluar pesë vjet prej shpërthimit të pandemisë në gjithë planetin. Sëmundja që e shkakton koronavirusin, COVID-19, ka shkatërruar ekonomi dhe sisteme shëndetësore në shumë vende të botës. “Ne vazhdojmë t’i bëjmë thirrje Kinës që të na japë qasje, që të kuptojmë më shumë për origjinën e COVID-19. Është nevojë morale dhe shkencore”, ka thënë OBSH-ja përmes një deklarate. Autoritetet në Shtetet e Bashkuara e kanë përmendur disa herë që nuk e përjashtojnë mundësinë e daljes së virusit nga ndonjë laborator në Kinë, ndonëse autoritetet kineze insistojnë që virusi është përhapur në një treg kafshësh. “Në javët, muajt dhe vitet që kanë pasuar, COVID-19 i ka ndryshuar jetët dhe botën tonë”, thotë OBSH ndër të tjera në komunikatën e saj. Organizata Botërore e Shëndetësisë e shpalli koronavirusin si pandemi më 11 mars të vitit 2020. Më shumë se 7 milionë njerëz kanë vdekur që prej shpërthimit të pandemisë në gjithë botën. Shtetet e Bashkuara kanë regjistruar numrin më të madh të viktimave, të ndjekura nga India dhe Brazili.