Një ngjarje aspak e zakontë u regjistrua këtë të hënë në mes të qytetit të Vlorës. Konflikti mes dy të rinjve, që nisi për një parakalim në zonën e Lungomares, rrezikoi të kthehej në tragjik për njërin prej tyre. 25-vjeçari Elis Hasanaj, që lëvizte me makinën e tij tip “Benz”, u konfliktua me 18-vjeçarin Glendi Danaj, që po udhëtonte me një mjet tip “Panda”. 25-vjeçari ka goditur në mënyrë të përsëritur me “Benz-in” e tij, makinën e adoleshentit, duke i shkatërruar mjetin dhe duke i rrezikuar jetën. Ngjarja është parë nga afër nga një efektiv i Forcave “Shqiponja”, që ka qenë jashtë shërbimit, por edhe nga patrullat në shërbim të policisë, që kanë ndërhyrë në kohë, duke parandaluar përplasjen. Pamjet e publikuara nga policia tregojnë momentin e përplasjes në mes të qytetit dhe në rrugën e mbushur me njerëz, ndërsa me të mbërritur në vendngjarje efektivët arrestuan 25-vjeçarin Hasanaj, i cili akuzohet për veprat penale “Shkatërrimi i pronës me mjete të tjera”, dhe “Prishja e rendit e qetësisë publike”.