Ministri i Kulturës në Itali, Gennaro Sangiuliano dha dorëheqjen pas një skandali me të dashurën e tij të fshehtë, Maria Rosaria Boccia, e cila postoi në LinkedIn se ishte emëruar si këshilltare e tij, duke tronditur kështu qeverinë e Melonit. Boccia publikoi disa dokumente, që sipas saj tregojnë se ka punuar si këshilltare e ministrit italian dhe ka marrë pjesë në udhëtime të shumta pune. “E kam shoqëruar si këshilltare për ngjarjet e mëdha dhe e kam ditur gjithmonë se ministria ka paguar, sikurse e nxjerrin në pah emailet që kam marrë nga kreu i sekretariatit”, u shpreh Boccia, që komentoi më tej deklaratat e Sangiuliano në intervistën 15-minutëshe në Tg1: “Ai zbuloi informacione të pasakta. Unë kam qenë gjithmonë me ministrin, jo në udhëtime të shkurtra, por gjithmonë në udhëtime të gjata”. Sipas Boccia, ajo dhe Sangiuliano kanë marrë pjesë në evente dhe koncerte, shpenzimet e të cilave janë mbuluar nga buxheti i ministrisë. “Kemi bërë edhe transferime personale, për koncerte si Coldplay dhe Il Volo. Nga Roma, ne u nisëm për në Pompei. Ne shkuam në eventet e mia personale dhe private, ku ai donte të merrte pjesë. Një event në bazën e Forcave Ajrore në Romë dhe një tjetër, por ashtu në Romë. Boccia, shkoi më tej duke pretenduar se ka disa njerëz që shantazhojnë ministrin për përfitimet që ajo ka marrë. “Kam dëgjuar biseda me mesazhe konkrete nga njerëz që për mendimin tim kanë shantazhuar ministrin. Mund të them se ka redaktorë të të përjavshmeve”, u shpreh Boccia.