Presidenti turk, Recep Tayyip Erdogan, deklaroi se Turqia mund të hyjë në Izrael, siç ka bërë në të kaluarën në Libi, ndonëse nuk ka treguar se për çfarë e ka pasur fjalën. Erdogan, kritik i ashpër i ofensivës së Izraelit në Gazë, ka folur për luftën përgjatë një fjalimi në të cilin ka lavdëruar industrinë e mbrojtjes së Turqisë. “Ne duhet të jemi shumë të fuqishëm, në mënyrë që Izraeli të mos i bëjë këto gjëra pamend në Palestinë. Nuk ekziston asnjë arsye pse të mos e bëjmë këtë… ne duhet të jemi të fuqishëm që të mund t’i marrim këta hapa”, ka thënë Erdogan para anëtarëve të partisë së tij. Përfaqësues të partisë së tij nuk u janë përgjigjur thirrjeve për më shumë hollësi. As Izraeli nuk i ka komentuar deklaratat e liderit turk. Erdogan duket se ka përmendur veprimet e Turqisë në të kaluarën. Më 2020, Turqia ka dërguar personel ushtarak në Libi, për të mbështetur Qeverinë e njohur prej Kombeve të Bashkuar atje. TP/ AFP