Një 9-vjeçar në Siri ndodhet në burg prej dhjetë ditësh, pasi u arrestua me akuzën për fyerje të imazhit ndaj presidentit Bashar Assad. Muhamed al Ali, u kap duke shkruar në një nga fotot e Assadit në shkollën në Marj Qata, një qytet në perëndim të Homsit, qyteti i tretë më i madh sirian në veri të Damaskut. Sipas burimeve, pasi u thirr dhe u “rrah” nga drejtori i institutit, fëmija, i cili është në klasën e katërt, u ndalua nga agjentët e Sigurisë Politike, një nga katër agjencitë kryesore të kontrollit dhe represionit të qeverisë siriane. Kjo u bë e ditur nga Observatori Kombëtar për të Drejtat e Njeriut në Siri, duke konfirmuar atë që u raportua më herët nga mediat lokale në Homs. “Për dhjetë ditë fëmija ndodhet i mbyllur në një qeli në selinë e Sigurisë Politike dhe çdo ditë prindërit e tij kërkojnë lirimin e tij të menjëhershëm”, raporton Observatori. Në një ngjarje të ngjashme, 13 vite më parë, pas arrestimit të disa fëmijëve që u quajtën fajtor se kishin shkruar slogane në muret e shkollës ku lavdëronin protestat e atëhershme arabe në Tunis dhe Egjipt, në Siri shpërthyen protesta popullore antiqeveritare. Autoritetet siriane iu përgjigjën protestave të marsit 2011 me një shtypje të përgjakshme policore dhe ushtarake, e cila degjeneroi në një luftë civile, e cila më pas u shndërrua në një luftë të vazhdueshme në shkallë rajonale dhe ndërkombëtare. Sipas OKB-së, konflikti sirian ka vrarë më shumë se gjysmë milioni njerëz.